Ýürek telwas eder, göterler serim,
Köňül arzuw eýlär watanym, seni!
Etrek, Gürgen ýurdum - gezen ýerlerim,
Köňül arzuw eýlär watanym, seni!

Sugunly, umgaly, çal goçly daglar,
Belentden pestine akan bulaglar,
Sowuk suwly, ter çemenli awlaglar,
Köňül arzuw eýlär watanym, seni!

Miwesi bihasap bakjaly baglar,
Awy binahaýat uly awlaglar,
Ýada düşer ajap döwranly çaglar,
Köňül arzuw eýlär watanym, seni!

Ýalaňaç horlanmaz mugan gyşyna,
Ýazyna dürli ot, maly başyna,
Ýaýlasynda her kim çykar daşyna,
Köňül arzuw eýlär watanym, seni!

Senemleri kasap puşeş geýerler,
Höreklerne şähdi-şeker iýerler,
Aşyk-magşuk olup, ýanyp köýerler,
Köňül arzuw eýlär watanym, seni!

Haýyp, abat iller ber-bibat boldy,
Dostlar gamgyn boldy, duşman şat boldy,
Aýrylyşdy, aşna, ýarlar ýat boldy,
Köňül arzuw eýlär watanym, seni!

Etdiler Ýusupny Müsürge soltan,
Diýdi: “Bolsam egdir bir guly Kengan”,
Ýurdundan turmasyn hiç bir musulman,
Köňül arzuw eýlär watanym, seni!

Köňlümiň aramy, çeşmim röwşeni,
Men neýläýin, dostlar, onsuz bu jany,
Görermikäm Seýidi dek janany,
Köňül arzuw eýlär watanym, seni!

Zelili, bu ýurtda aýyş ýok, höwes ýok,
Her kim başyna gaý belent ýok, pes ýok,
Toý, tomaşa, märeke ýok, meýlis ýok,
Köňül arzuw eýlär watanym, seni!

BOLDUM

Ýesir bolup munda gelip,
Jandan doýan ýaly boldum.
Ýagşy meýlisden aýrylyp,
Göýä çopan ýaly boldum.

Garyplyk aldy kuwwaty,
Çeker boldum muşakgaty,
Ýüz-müň gaýgy-garamaty-
Başa goýan ýaly boldum.

Taşlap geldik ol mekany,
Jebre saldyk şirin jany,
Pähm edip peýda, zyýany -
Indi duýan ýaly boldum.

Howp aldy aklyň öýüni,
Aldyrdyk iliň ýerini,
Indi watanyň şükrüni-
Ýagşy bilen ýaly boldum.

Görmedim köňül çagyny,
Aldyrdym ýürek ýagyny,
Çekip watanyň dagyny,
Oda köýen ýaly boldum.

Ötdi aýralyk yzasy,
Gaçdy Hywanyň mazasy,
Göýä bir otly lybasy -
Egne geýen ýaly boldum.

Näler gördük zalym handan,
Aýyrdy eziz watandan,
Zelili diýer, şu mekandan -
Göýä doýan ýaly boldum.

Ýakyn köňül bilen bu ýyrak ýerden,
Gönderdim men saňa nyşan Seýidi;
Ýollar hyz-haramy aralyk ýaman,
Baryp hal-ahwalyň sorma, Seýidi.

Üç ýyl boldy bir görmäli didaryň,
Gelmedi bir hat, galamyň, güftaryň,
Azaby kyýamat çeken azaryň.
Hak berdi derdiňe şypa, Seýidi.

Eşitdim gidip sen karyzdar bolup,
Hatyjany bir görmäge zar bolup,
Ýat illerde garyplykdan har bolup,
Göçe-göçe ilden-ile, Seýidi.

Söz sorana diýrem aklym ýetenden,
Pent alana birin zehnim tutandan,
Tä ölinçä aýyrmasyn watandan,
Hiç bir bendesini huda, Seýidi.

Dert kän, dert kän kaýsysyna ýanaly,
Synam üzre çapraz-çapraz ýaraly,
Ataşsyz örtedi, porsy gaýraly,
Berdi jaýsyz jöwri-jepa, Seýidi.

Ýat etsem şol öten ýowuz günleri,
Eşki çeşmim derýa eder çölleri,
Parahat oturan abat illeri,
Bibat etdi bu paňkelle, Seýidi.

Gije bardy, gündiz barmady aýyk,
Gapyllykda harap boldy halaýyk,
Iş etmedi musulmanlyga laýyk,
Saldy başlaryna gowga, Seýidi.

Sürüldiler il barysy eňşeşip,
Pyganyna daglar, daşlar gymşaşyp,
Asman joşa geldi, Zemin gowşaşyp,
Bulutlar durdular nala, Seýidi.

Görmesin ol jebri musulman bende,
Bady-boran garlyp ýagar tün günde,
Köpi ölüp galdy, az çykdy zynda,
Arkaç indi ula-ula, Seýidi.

Mümin bolan bolar bu işe girýan,
Bagry para-para, baglap ýürek gan,
Ýesiriň ilersi barypdyr Tähran,
Gaýrasy dolupdyr Hywa, Seýidi.

Diýmek size ne hajatdyr, gördüňiz,
Sözlemesek egsilmeýär derdimiz,
Ýokarsy Ýolöten, aşagy deňiz,
Pytrady il bu iki ara, Seýidi.

Kimi garyp goňşy, kimisi daýhan,
Kimi goýun çopan, kimisi serwan,
Gözel iliň şeýle bolanna dözmän,
Men aglaryn, sen hem agla, Seýidi.

Men bilmeýän siňipmidir gargyşlar,
Geldi bir musallat, dagyldy başlar,
Pelek bakyp, ýene dönse gerdişler,
Şaýat rehm eýlese Alla, Seýidi.

Ürgenji illerimiz gaýtsalar bäri,
Saga-sola dargan ýygylsa bary,
Jem bolup ýöresek, galmasa biri,
Sürüp barsak Garrygala, Seýidi.

Çomry onda bolsa, çarwa Sergizde,
Günbatary Çatda, Oýlyň düzünde,
Gündogary Hartut, ardy Margizde,
Öňi baryp gonsa Guwla, Seýidi.

Zelili diýr şol jaýlara baransoň,
Bir niçe gün hoş günleri görensoň,
Sizler bile zowky, sapa sürensoň,
Arman galmaz, dolsa kaza, Seýidi.

Göter diýip tagna, terene etme,
Dünýä mesi bir murdara ýaraşmaz.
Nesihat bermeklik, öwüt öwretmek,
Taňry guýan akyl äre ýaraşmaz.

Asly musulmana dininden dänmek,
Ömre ygtybar, jan barlygyna ynanmak,
Begres geýip, bile kemer guşanmak,
Çölde gezen çopanlara ýaraşmaz.

Kümüş bolmaz ýagşy zikge ursaň mise,
Gahry gelmez eger gul diýseň tüýse,
Öwüt tutmaz, öwüt berseň bir pise,
Ýagşy taglym ýaman ýara ýaraşmaz.

Näsazlyk ata-ogul biri-birine,
Gitmeklik ýaraşmaz gyz ýas ýerine,
Haýasyzlyk, şerimsizlik geline,
Oral garry aýal töre ýaraşmaz.

Boş gaýtarmaz, dileg etseň bir mertden,
Müň ýalbarsaň işiň bitmez namartdan,
Ker hem lezzet tapmaz asta söhbetden,
Idegsiz gezmeklik köre ýaraşmaz.

Aryplara oýnamaklyk, gülmeklik,
Dünýälik diýip ýügürmeklik, ýelmeklik,
Aşrat sürmek, aş mazasyn bilmezlik-
Ejiz düşen bir biçärä ýaraşmaz.

Ýada hem näz etmek, öýke - gardaşa,
Pala, gurra uýmak, ynanmak - düýşe,
Dogaça - utanmak, gahar - derwüşe,
Nebs üçin il gezmek, pire ýaraşmaz.

Bigadra - gadr etmek, näkese - hormat,
Ýakyna - hat ýazmak, ýyraga - sargyt,
Abdala - nik puşeş, aşyga - rahat,
Hatarda boş gitmek, nere ýaraşmaz.

Ite - palaw bermek, ata hem - kepek,
Owlak, guza - nogta, kökene - köşek,
Alamana - ýaby, ýaryşa - eşek,
Toýa münüp gitmek sygra ýaraşmaz.

Doňuz çyksa depä, jeren hem daga,
Bilbil hem jeňňele, garga hem baga,
Pyşbaga agaja, uçsa gurbaga,
Kelpezeden gaçmak, mara ýaraşmaz.

Mur yssa çydamaz, sowuga - kelguş,
Ýele hem - ýerbeze, köp ýagmyra - muş,
Şor aba hemdüňe bahr içre harguş,
Näheň oýnap çyksa gyra ýaraşmaz.

Aýydýar Zelili hasta - hoşroýluk,
Gerk uzak ýaşamaz, pile - garrylyk,
Gurda - dilegçilik, baýguşa - horluk,
Tilki awun iýmek, şire ýaraşmaz.