Aždarha dek ýassanyp, genji-nahana zülpüň,
Meşhury älem olmuş, pany jahana zülpüň,
Görkezmedi gül ýüzüň, bag Ispihana zülpüň,
Äleme anbar saçar, degende şana zülpüň,
Neýleý ki ot salypdyr, men natuwana zülpüň.

Haý-haý seniň ýörişiň arslana, şire ogşar,
Ala-ala gözleriň janymny iýre ogşar,
Halka-halka zülpleriň kementli dara ogşar,
Örüm-örüm saçlaryň owsunçy mara ogşar,
Her tary başga-başga, ot saldy jana zülpüň.

Ençe dessan eýlerem ýaryň çeşmi - mestine,
Bir mylaýym söz bilen, gülüp baksa dostuna,
Ýerden göter zülpüňi, goýma aýak astyna,
Sähelçesin sypalap, goýber ýüzüň üstüne.
Dökülsin zire-zire näzik nahana zülpüň.

Görüp ol mahy-ruýyň, köňül her ýana ýortar,
Görkezmeseň ýüzüňni, gozgalar, derdim artar,
Otursaň, saç darasaň, saçyň ýüzüňni örter,
Saňa aşyk bolanyň, elbetde, gany dartar,
Galar her gün webala, ýüz nähak gana zülpüň.

Eý doganlar, neýläýin, kine-şikesdir maňa,
Dünýä baky berilmez, sen bolsaň, besdir maňa,
Sen gözüňden salmasaň, bu dünýä dürsdür maňa,
Meger gözüňden salsaň, bu dünýä ýasdyr maňa,
Gyzyl suwun beräli, getir dükana zülpüň.

Dürli-dürli iýmişiň tapylmaz her agaçda,
Bäh, ne katdy-kamatyň, zülaly boýda, başda,
Ýöräp-ýöräp ýetişsem, tarypyň eşde-eşde,
Darap-darap goýberseň, ýüzüňden puşda-puşda,
Altyn suwun beräli, getir dükana zülpüň.

Hup açylmyş gülleriň, güllerden özge bolsun,
Sözle, şirin tilleriň, tillerden özge bolsun,
Guçam näzik billeriň, billerden özge bolsun,
Biziň tutan işimiz illerden özge bolsun,
Akyzyp eşki-ganym, aby-rowana zülpüň.

Gel, gidäli, Kemine, seýli-çemen isteseň,
Läle-reýhan açylan ter enjimden isteseň,
Lagly göwher dakynyp, dürri Ýemen isteseň,
Zülpüň her bir taryna ýüz müň tümen isteseň,
Nagt bereýin pullaryň, bir-birden sana zülpüň.

Günbe-günden hyruç edip özüňden,
Ganym sary atlanar sen, Orazym;
Bir hudanyň beren üleş-paýyndan
Her söweşde, jeňde bar sen, Orazym.

Uly illeriň arkasy sen, ardy sen,
Goçagyň goçy sen, goçuň merdi sen,
Dagda - peleň, jülgeleriň gurdy sen,
Duşman görseň, etin iýr sen, Orazym.

Duşman görse, çykar syýasat bile,
Tuwulga, çaraýna, boz sowut bile,
Ala çakmak tüpeň, arap at bile,
Ýalançyny hoş geçir sen, Orazym.

Öňki batyrlaryň kesbin ýörüden,
Algyrlygyň zyýat erer börüden,
Pilden, kergedenden, döwden, periden
Taýpar çekip ýan bermer sen, Orazym.

Kemine diýr, adamzatdan ýüz görmen,
Ýagşa ýagşy diýr men, ýamana - ýaman,
Mert bile namardy görsem, tanyr men,
Sen bir ýalňyz dogan är sen, Orazym.

Bu dünýäde gapyl boldum oturdym,
Deprenmedim şirin janyň barynda;
Jahanyň gaýgysyn tartyp getirdim,
Dara düşdüm giň jahanyň barynda.

Dostlar bilen bir magrypet açmadym,
Gül ömrümde gül-gunçasyn guçmadym,
Näzi-nygmat görüp, iýip-içmedim,
Aşsyz galdym, aşyň, nanyň barynda.

Belent ýere çykyp garandym daşym,
Köňlüm müň paradyr, ýalňyzdyr başym,
Hany meniň jana-janym, ýoldaşym?
Mysapyr men Söýünhanyň barynda.

Göge uzatsam, göge elim ýetmeýär,
Ýere baksam, köňlüm karar etmeýär,
Seniň şu dünýäňe mährim gitmeýär,
Gara ýeriň - aždarhanyň barynda.

Peşe uçsa, ganaty bar, jany bar,
Garynjanyň öz ornunda sany bar,
Her öýüň bir adalatly hany bar,
Hansyz galdym, begiň, hanyň barynda.

Bir kem otuz ýyldyr sürüşdim döwran,
Ýar, sensiz gerekmez bu pany jahan!
Kemine, bakardyň tawus dek her ýan,
Indi şatlyk ýokdur dünýä barynda.

Hoş gelip siz, hoşluk bilen gider siz.
Dünýäniň seýline gelen gelinler!
Bozulgan şährimi abat eder siz,
Gamda galan köňlüm alan gelinler.

Ak öýüň eýesi - baýyň gyzlary,
Eýýämiň soltany diýrler sizleri,
Hyzmata mynasyp görüň bizleri,
Muhupbet saýasyn salan gelinler.

Äre güftar gerek, gözele - summat,
Her kime ýetdirmez, bahasy gymmat,
Uzyn boýly, giň gujakly hoş surat,
Hezzeti-hormaty bilen gelinler.

Ak ýüzüne gara zülpün ýaýypdyr,
Göýä aýyň ýüzün bulut alypdyr,
Hassa janym, buşluk, tebip gelipdir!
Derdimiň dermany bolan gelinler.

Bag miwesi bolar şirin dil ýaly,
Belli-belli sözüň bardyr bal ýaly,
Kemine diýr, akly-gyzyl gül ýaly,
Aşygyň janyny alan gelinler.