Men diýem, müminler, remezan mahy,
Galandyr serimiz galla ýigitler.
Gelgende kapyryň soldady, şahy,
Düzdüler şemşire, güllä ýigitler.

Ruzy sişenbede guruldy bazy,
Doldurdy dünýäni myltygyň sazy,
Kimi şehit boldy, kimseler gazy,
Murgy behişt boldy Alla ýigitler.

Ganym aldy galamyzyň daşyny,
Sebäp bilen syndy agyr goşuny,
Gaýrat edip, bisünniniň läşini,
Ýetgirdi her biri ellä ýigitler.

Ejizlermiz aglaşdylar elenip,
Gan ýuwtuldy efgan ablar bulanyp,
Puşman etdi gitdi, ketin, keýin dolanyp,
Eýlemedik biz töwella ýigitler.

Gan görüldi batyrlaryň gözünden,
Gün tutuldy at dilinden tozundan,
Alp ýürekli aýrylmady yzyndan,
Ýetirginçä baryp pellä ýigitler.

Namart ogly görünmedi ýer kimin,
Ärden dogan arlap galdy şir kimin,
Söweş güni çille mesi ner kimin,
Dürli duman geldi kellä ýigitler.

Danyşaýyn näme gelse dahana,
Arkaç aglar aýny düşse pygana,
Mätäji diýr, şükür kylyň Subhana,
Bizge nusrat berdi Alla ýigitler.

Ýaşyl öwsüp ala dagyň degresi,
Aýlanyp çykmaly ýolar onda bar,
Geýinip çykarlar mahmal, begresi,
Şeýle şahandazly iller onda bar.

Gaýalary ýalkym atar her çende,
Ýakymly şamallar öwsüp her günde,
Atylan ok ýaly barar her kanda,
Çaparman, gyl boýun mallar onda bar.

Dag başynda şaglap geler çeşmesi,
Görmedige kyndyr münüp-düşmesi,
Ýakyn geldi miweleriniň bişmesi,
Her elde zarafşan güller onda bar.

Söze gulak salyň, eý ýary-ýaran,
Aman-esen bolsun bizleri soran,
Bulutlar oýnaşyp, köp ýagsa baran,
Daga-daşa uran siller onda bar.

Özünüň islegi - görnüne ýeten,
Täze dogan aý dek sallanyp öten,
Mätäji aglady, ýat edip Watan,
Uzyn boýly, inçe biller onda bar.

Ata çykan aňly bolsa her ýoldan,
Berimli, pähimli hany gerektir,
Ýaranlar ýörise sagyndan - soldan,
Görogly beg kimin syny gerekdir.

Ýow ýolugyp, ýowuz myltyk atylsa,
Kimi ölüp, kimseleri tutulsa,
Gylyç syryp, bir-birigi gatylsa,
Jöwher kulah, demir dony gerekdir.

Meýdan era jeňňi-maglub gaýrylsa,
Agdarlyşyp, arap atlar maýrylsa,
Goç ýigitler ters söweşip aýrylsa,
Jyzasynda gyrmyz gany gerekdir.

Er boldajy ar üstünde çapylsa,
Wadasynda-ykrarynda tapylsa,
Gähi-gähi deri-derman sepilse,
Bedeninde tyg nyşany gerekdir.

At gerek gaçmaga, kowsa ýetmäge,
Gaňyrlyp ganymy-zeper etmäge,
Märekede diýen sözi bitmäge,
Etrabynda ýeňi-ýany gerekdir.

Ýigrimä, otuza ýetende saly,
Serpilmez serinden sed müň hyýaly,
Meger bolaý diýse Hatam-Taý ýaly,
Egsilmeýän genji-käni gerekdir.

Habar ber Jemşidu Şabährem kany?
Olary ýuwdandyr ýalançy-pany,
Jahanda jem bolsa maslahat güni,
Danyşanda hoş zybany gerekdir.

Han ýanynda ekrem bilen otursa,
Gelgeninde halat-serpaý getirse,
Ýalançyny abraý bilen ötürse,
Aherýetde nur-imany gerekdir.

Gözüň ýumup girseň, umman düýbüne,
Ýagşy ýigit manent rahmet ýabyna,
Mätäji, diýr, myhman gelse babyna
Er daýaly ak juwany gerekdir.

Peň açar, hoş saýaly,
Seniň ysyň hoşdan, bugdaý.
Ekip kemala getiren,
Kimdir seni başdan, bugdaý.

Ujalap peliň başyna,
Tohum göýbermän daşyna,
Berk tutup ýaby goşuna.
Günde ekdim üçden bugdaý.

Daş ýanyňda malyn güýdüp,
Gatnawyň kän, gelip-gidip,
Elmydama enjamyň edip,
Suw berer men keşden, bugday.

Ýagma, sowuk-aýaz görüp,
Çüýremezdüýbüň suw urup,
Ne ýatyp sen penjäň gerip,
Düýş almagyň gyşdan, bugdaý.

Baran ýagar düýbüň ezip,
Göwnüm seýran eder gezip,
Bäş hanadan başyň düzüp,
Gök salar sen daşdan, bugdaý.

Ýapraklaryň lerzanadyr,
Aslyň seniň dur, dänedir,
Her bir başyň bäş hanadyr,
Towzaň bir garyşdan bugdaý.

Emgegiň ýok paýdar-paýa,
Sen barkaň paý ýok arpaýa,
Bäş batmany bir urpyýa,
Ýylda nyrhyň başdan, bugdaý.

Mätäji diýr, dünýä genji,
Ýedi aý daýhan guwanjy,
Ýagşy diýrlerler mäş, bürünji,
Kem dälsiň hiç aşdan, bugdaý.

Namyradam, nädeýin men, namys-ar elden gider,
Nury-didäm, nukta hallar, zülpi tar elden gider,
Aýyp kylmaň, eý ýaranlar, namydar elden gider,
Gözlerimiň röwşeni, bikarar elden gider.

Serimni söwdaga salgan, serwigä arzym aýdaýyn,
Semender deý sargaryp, ataş şerabyn dadaýyn,
Dostlarym, deň-duşlarym duşman bolupdyr nädeýin,
Şol sebäpden aglaýyr men, näzli ýar elden gider.

Gözlerim görmez diýip, hiç göwnüme getirmedim,
Sagdy-ýu Seýpelmelekniň yzyny ýitirmedim,
Sarnaýyp şamu-säherler, illeri ýatyrmadym,
Neýleýin sabrym bilen hem karar elden gider.

Men oňa sadka bolaý hem dahy çopany, guly,
Agyr märeke era üm bilen düşir dili,
Onuň ysy müşki-anbar, istenmes men her güli,
Engury, injiri, hurma, alma, nar elden gider...

Hiç alajyn tapmasam, dagym bilen barsam gerek,
Gijelerde şam-çyragyň, gül ýüzüň görsem gerek,
Yşkynda perwaz urup, ýolunda jan bersem gerek,
Şol sebäpden aglaýyr men, näzli ýar elden gider.

Bezenip beýge çykanda, begleri berbet kylasy,
Saglary telbe kylyp, telbeler syçrap galasy,
Ele düşüp, ekdi bolgan, boz keýikniň balasy,
Awçylarnyň awlagy, ak maral elden gider.